Txinzerreko langileen erosahalmena azken urteetan %16 apaldu dela, eta baliokideak diren FCC udal azpikontratako garbitzaileek baino ia 5.000 euro gutxiago kobratzen dutela gogoratu dute. Ekainean zuzendaritzak «hutsaren hurrengoa» eskaini ondoren, urritik 23 eguneko greba egun egin dituzte. Baina enpresak «akordiorik lortzeko benetako asmorik ez» duela salatzen dute. Negoziatu ezean «greba mugagabera jotzea alternatiba besterik ez» dutela izango iragarri dute, eta Irungo zein Hondarribiko agintarien inplikazioa exijitu dute.

Lan hitzarmenaren negoziazioa edukiz hustu izana leporatzen diote Irungo eta Hondarribiko urak eta hondakinak kudeatzen dituen Txingudiko Zerbitzuak enpresari. «Langileekiko errespetuzko negoziazio zintzo bat» exijitzeko, eta hitzarmen berria lortu arte, mobilizatzen jarraituko dute. Gaur bezala, azaroaren 5ean ere lanuztea deitu dute, eta azaroaren 10ean egun osoko grebara deitu dute.