Sei hilabeteko greba mugagabea bertan behera utzi dute Txingudiko Zerbitzuetako 35 grebalariek. Gaur izenpetu dute lan hitzarmen berria, abuztutik aurrera 82 langile dituen plantilla osoari aplikatuko zaion %4,29ko soldata igoera adostuta. «Hasieran ezinezkotzat jotzen ziren beste hainbat hobekuntza nabarmen» lortu dituztela aditzera eman du ELA sindikatuak: txandakako lana, amiantoarekin lan egitea edota guardien plusak, adibidez. Akordioa mugarri bat da haien ustetan, «greba eta langileen arteko kohesioa lan baldintzak hobetzeko tresna eraginkorra dela» erakutsi dutelako.

Grebalariek azken aurreakordioa sinatzera zihoazen atzo, baina Leire Zubitur zuzendariak hitzez adostutakoa erretiratu egin du idatzizko proposamenean. «Negoziatzeko jokabide maltzurra eta gaiztoa» kontsideratzen du ELA sindikatuak, eta 170 greba egun ondoren «gatazka alferrik luzatzea» leporatzen diote zuzendaritzari. Langileei fede-ekintza bat eskatzea «onartezina» dela diote, eta «konfiantza guztiz apurtuta» ardura politikoak dituzten Irungo eta Hondarribiko alkateak interpelatu dituzte enegarren aldiz. Plantillak «printzipio sinple baina ukiezin baten alde borrokan» jarraituko duela hitzeman dute, hau da, «gaixotzea ez dela inoiz zigor ekonomiko bihurtu behar».