Irungo Udalak eta Irungo Emakumeen Etxeko Elkarteak (IEEE) Kantu Tailer Feminista antolatu dute. Ana San Jose Amianok zuzenduta, maiatzaren 6tik abenduaren 18ra bitartean astean behin elkartzeko aukera eman nahi die emakumeei, euskarazko zein gaztelaniazko taldeetan, «leku seguru batean eta elkar zaintzeko giro goxoan, epaituak izan gabe». Izena emateko epea ostegun honetan, apirilak 30, itxiko dute.

Merkantzien garraioan oraindik ere gizonak dira gehienak, baina bidaiarien sektorean emakume gidari asko dagoela ondorioztatu dute Plaiaundi Lanbide Heziketa Institutuak antolatutako emakume profesionalen arteko mahai-inguruan. Emakumearen Nazioarteko Egunarekin bat eginez, emakume gidariak eta irakasleak gonbidatu dituzte, haien esperientzia kontatu eta sektoreak dauzkan genero-arrakalari dagozkion erronkak aztertzeko. Sektorea aldatzen ari dela diote, baina oraindik ere estereotipoek pisu handia dutela.