Azaroaren 23an Venezuelan egindako Herri Kontsulta Nazionalak parte-hartze handia izan zuen, 5.336 komunatan eta ia 10.000 bozketa-puntutan antolatuta, giro politiko tentsionatuan. Autogobernuaren eta komunitate-antolakuntzaren adierazpen irmoa izan zen, 79 nazioarteko behatzailek jarraitua, tartean Euskal Herriko ordezkaritza batek. Gaur gurekin ditugu ordezkaritza horretako bi kide, Itsaso Lekuona eta Iker Eizagirre. Bi gonbidatuak Bidasoa eskualdeko bizilagunak dira.

Bortzirietako abeltzainek sustatuta eta, lehen aldiz, Lesakako Udalaren Parte-Hartze Ordenantza erabiliz, Ferien egunaren inguruko herri galdeketa eginen dute igande honetan, azaroaren 30ean, Lesakan. Lesakarrek Feria eguna ortzegunean edo ortziralean egin nahi duten erabakiko dute bozketa bidez. 16 urtetik gorako eta herrian erroldatutako biztanleek eman dezakete bozka eta ordutegi zabala ere proposatu du Udalak horretarako.