300 lagun baino gehiago elkartu ziren atzo Istillaga plazan Nagore Laffage omendu eta bere senideak babesteko. Irundar gaztearen hilketaren 18. urteurrenean, Asun Casasolak bere alaba gogoan gordetzeko beharra nabarmendu du, baina «atzera begiratu beharrean, aurrera begira halakorik berriz gerta ez dadin». Irungo Udalak eta Irungo Emakumeen Etxea Elkarteak antolatutako omenaldian, Asun Casasola Ipuin Lehiaketako kontakizunen irakurketa dramatizatuaz gain, kantu tailer feministaren abesbatzak ere parte hartu zuen, «Nagoreren oroitzapenak herritarren bihotzetan bizirik mantentzen dela» erakutsiz.

Goizean 2.400 lagunek parte hartu dute Irungo Alarde Publikoan. Asteguna izanagatik ere, inoiz baino babes handiagoarekin desfilatu dute eta espaloiak txaloz bete egin dira ibilbide osoan zehar. Arratsalderako, aldiz, zenbait kolektibok Kale Nagusian alarde parekidearen aurrean «indar erakustaldia» egiteko deialdiarekin kezka adierazi dute Alarde Publikoan ez ezik, hainbat ordezkari politikok ere. Egoera irauli eta atzera ez egiteko «udalaren eta gobernuen inplikazioa» aldarrikatu dute EH Bilduk eta Ahal Duguk. Izan ere, emakumeak soldaduz jantzita lehen aldiz desfilatzen saiatu zirela 30 urte betetzen diren honetan, «mehatxuekin giroa bero dabilela eta bizikidetzan atzerapausoak» eman direla ohartarazi dute.