Tadamum Txingudiko Sahararen Lagunak elkartea Elikagaien Euskal Karabana itxaropenez betetzeko kanpaina egiten ari da aste honetan. Otsailak 6an eta 7an Irungo eta Hondarribiko BM, Super Amara eta Eroskiren 17 saltokitan topatuko dituzue boluntarioak janaria jasotzen, baina eskualdeko eskoletan ere ari dira biltzen. Arroza, pasta, lekale lehorrak, azukrea, atuna eta bestelako kontserbak, konpresak edota haurren pardelak behar dituzte Aljeriako basamortuko errefuxiatu kanpalekuetara eramateko.

Udako Oporrak Bakean harrera programaren kanpaina aurreratu behar izan dute aurten, Espainiako Gobernuak harrera familiak onartu eta haur sahararren bidaia-baimenak eskuratzeko burokrazia mailan legeak zorroztu dituelako. Aldi berean, inoiz baino laguntza premiarik handiena dute Tindufeko errefuxiatu kanpalekuetan, eta otsailaren 6an eta 7an Irun-Hondarribiko BM eta EROSKI 17 supermerkatuetan Elikagaien Euskal Karabana betetzeko bilketa kanpaina egingo dute.