Maiatzaren 4an itxiko dute izena emateko epea, eta Hondarribian gutxienez urtebeteko errolda edo azken 10 urteetan bost urtez herrian bizi izan direnei zuzenduta dago. Etxebidek sustatutako etxebizitza eskaintza publikorako eskatzaileen erregistroan alta emanda egotea ezinbestekoa da, eta 2024ko diru-sarrerak kontuan hartuko ditu Eusko Jaurlaritzak, gutxienez 9.000 eta gehienez ere 46.463,29 euro. Presa I etxebizitzen eraikuntza lanak 2024ko urtarrilean hasi zituzten, eta VISESA sozietate publikoak 2026ko irailean Alokabideri eman nahi dizkio, eraikuntza lan guztiak behin amaitutakoan.

Irungo Udalak Etxebizitza Legeari tranpa eginez, beste eremu batzuetan legeak behartzen zuen etxebizitza publikoen portzentai osoa San Migel-Anakara «modu sistematikoan» eraman duela salatu du EH Bilduk. Beraz, «egungo etxebizitza larrialdia, hein handi batean, urteetan bultzatu diren politika publikoen ondorio» dela. Irunvin babes publikoko etxebizitza baterako 3.000 eskatzaile baino gehiago daudela gogoratu du Ane Unanue hautetsiak, eta «ospakizunetatik harago, etxebizitza udal politiken erdigunean jartzeko» eskatu dio PSE-EAJren udal gobernuari.