Guadalupeko gotorlekuaren hainbat egitura zaharberritzeko 300.000 euroko inbertsioa egin du Hondarribiko Udalak azken bi urtetan, Eusko Jaurlaritzak kudeatutako Europako NextGeneration diru-funtsari esker. 2025ean 1.203 lagunek Arma Plazan erreserba bidez bisitatzeko aukera izan duten arren, Hondarribiko «egitura arkitektoniko-historiko handiena eta ezezagunena» aurrerantzean herritarrentzat «parte batean irekita» uzteko asmoa aditzera eman du Igor Enparan alkateak.

Fernando Cobos Guerra, Erdi Aroko gotorleku eta hirigintzan arkitekto doktoreak ‘San Nikolas atea eta barruan edo kanpoan zauden jakiteko arazoa’ izenburupean, hitzaldia eta bisita gidatua eskainiko du azaroaren 7an eta 8an. Ezagutu Zure Hiria ekimenaren baitan, garai bateko hiribilduaren iparraldeko muga izandako atearen historia eta bertan egingo dituzten birgaitze lanak azalduko ditu.