Erdi Aroko Hondarribiaren lekuko zuzena eta hiriko defentsa-sistemaren parte, XVI. mendera arte, San Nikolas atea izan zen hiribilduko garrantzitsuena, harik eta hegoaldeko Santa Maria atea ireki zuten arte. Ezkututa geratu den haren jatorrizko harrizko egiturak berreskuratzeko 156.525 euroko inbertsioa egingo du Hondarribiko Udalak Eusko Jaurlaritzako Ondare Sailaren laguntza ekonomikoarekin.

Arrantzale baten alaba behar du izan Hondarribiko "Kutxa" eramaileak. Eta Olaia Goikoetxea Goikoetxearen familia-sarea Done Pedro Itsasgizonen Kofradiari estuki lotuta dago, aita ez ezik, bi aitonak ere arrantzaleak baitziren, eta amona sare konpontzailea. Aurtengo Santiago egunean Euskal Herriko usadiorik zaharrenetarikoan protagonista izatea harrotasunez bizi du. 23 urte ditu eta Kutxa eramateko «ardura eta ohore handia» sentitzen du, eta Abade Nagusiak hautatu zuenetik, astelehenetik ostiralera egunero entrenatzen aritu da hilabete honetan Beko Errotan, arrantza oparotasun erritua arbasoengandik jaso bezala betetzeko.